Beste Ouers,

Welkom by die laaste kwartaal van die jaar – Kwartaal Vier!

Dit voel altyd soos ’n oogwink en skielik is ons hier, reg aan die einde van nog ’n opwindende skooljaar. Ons hoop julle het ’n heerlike, ontspannende kort vakansie gehad en dat almal nou reg is om hierdie laaste stukkie wedloop met volle energie aan te pak!

Kwartaal Vier is die “sprint” na die eindstreep, en dit is veral belangrik vir ons leerders.

Die laaste stukkie pad

Hierdie kwartaal gaan alles oor vasbyt, fokus en afronding. Vir ons Graad 4 tot 7 leerders is dit die groot finaal – die eksamens wat die hele jaar se werk afsluit. Vir al ons leerders is dit die kans om enige laaste gaping in hul kennis toe te maak en om te wys hoe ver hulle hierdie jaar gevorder het.

Aan ons kinders: Dit is tyd om die skouer aan die wiel te sit! Dink aan julself as atlete wat vir die laaste keer vir daardie goue medalje hardloop. Ons weet julle kan dit doen! Elke uur wat jy nou aan hersiening, huiswerk en vrae vra bestee, is ’n belegging in jou sukses.

Ons moedig elke leerder aan om hierdie kwartaal met ‘n positiewe gesindheid en ‘n “Ek kan dit!”-houding aan te pak. Moenie bang wees om te vra, te leer, en jou beste self in die klaskamer te wees nie.

Belangrike wenke vir ’n suksesvolle afronding

1. Bywoning is alles: Moenie ‘n dag mis nie, elke dag tel!
2. Hersiening, Hersiening, Hersiening: Moenie wag vir die laaste minuut nie. Begin nou met ’n bietjie elke dag. Werk saam met jou vriende en vra jou onderwysers.
3. Gesonde balans: Sorg dat julle steeds genoeg slaap, gesond eet, en tyd vir speel inruim. ’n Uitgeruste brein leer beter.
4. Kommunikeer: Ouers, as julle enige bekommernisse het, of as julle kinders sukkel, moet asseblief nie huiwer om met die onderwysers te praat nie. Ons is hier om saam met julle te werk.

Ouers, weereens dankie vir julle ongelooflike ondersteuning deur die jaar. Julle aanmoediging by die huis maak die grootste verskil. Kom ons werk saam om hierdie skooljaar op ‘n hoë noot af te sluit!

Ons sien uit na ‘n gefokusde, suksesvolle en feestelike einde van die jaar!

Sterkte aan elke leerder.  Mag julle harde werk vrugte dra!

Vriendelike groete,